拍戲賺錢為推動環保？里安納度歷年捐1億美元 仲係多個團體嘅大使

90年代出道至今，唔少觀眾可以話係睇住里安納度狄卡比奧（Leonardo DiCaprio）大，由Titanic嘅靚仔小生演變成不斷挑戰演技嘅實力派之餘，里安納度多年來都做咗好多環保相關嘅公益活動，唔係拍條片呼籲吓就當做咗！佢真係出錢出力又出心，會以為推動環保先係正職。

因為《鐵達尼號》而成為全球男神之後，里安納度喺1998年以年僅24歲之齡，成立以自己命名嘅環保基金會Leonardo DiCaprio Foundation，目標係尋求辦法恢復日益受損嘅地球生態，主要關注野生環境保育、海洋保育、氣候變化等。2019年里安納度仲同已故蘋果公司創辦人Steve Jobs嘅遺孀Laurene Powell Jobs以及全球野生動物保護協會主席Brian Sheth合作創立非牟利組織Earth Alliance，並且以組織名義捐出300萬美元，協助去年發生大型山火嘅澳洲，進行災後善後工作。據估計，里安納度歷年嘅捐款數目高達一億美元！

除此之外，里安納度亦都運用明星嘅影響力，成為多個團體嘅董事局成員，例如世界野生基金會（WWF）、國際動物權益基金及Oceans 5等；作為電影人，里安納度擔任多部探討氣候問題紀錄片嘅監製，包括The 11th Hour, Before the Flood等。

唔少明星都會用社交媒體發聲，如果你有follow里安納度嘅帳戶，唔難發現佢post嘅都係同環保有關嘅帖文，selfie同飲飲食食嘅相甚至廣告post？似乎冇喎！

正正因為付出咁多，聯合國喺2014年委任里安納度成為和平特使，負責宣揚關注氣候變化嘅訊息。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！