新居屋中咗都撻Q 事前一筆定要知

抽中新居屋，形勢已比人強，但如果事前準備不足，仍有可能臨門撻Ｑ，點先避免到樂極生悲？

下載Yahoo財經APP
美股、外匯、加密貨幣免費即時報價，自選投資組合獲取相關新聞提示。

「居屋2020」揀樓過程已入咗直路，其中最受歡迎鑽石山居屋王「啟翔苑」已賣出近九成，抽中咗等同中六合彩。不過，近日卻出現首宗攤訂數十萬元個案，引起網民熱議，不單白白浪費上車黃金機會，兼倒錢落海。

買新居屋已有保護罩

其實，買新居屋已經有好多著數，白表買家最高獲批9成按揭，同時房委會為買家按揭貸款作擔保，故買家有機會獲批高成數按揭之餘，又唔需繳付按揭保費。同時，買家又不需通過壓力測試，得到銀行批出按揭較其他物業容易，差唔多直通一樣。

不過，如果仍出現撻訂，可能同事前未計清楚條數有關，換言之未準備好首筆資金。

注意計算印花稅方法

以去年最貴鑽石山「啟翔苑」單位為例，售價為489萬元，首期最少只需10%，即預先要準備好49萬元。要重要是，計及首置印花稅時，要還原六折優惠，以市價計印花稅，所以最貴「啟翔苑」單位，市價要成815萬元，就算最終估價有可能低過815萬元，但安全起見以815萬計首置印花稅3.75%，即大概預留30萬元，再加上新居屋大多是清水樓，入伙前要預留裝修費約20萬元，當然裝修費豐儉由人，計埋整筆資金要成100萬元。

除了準備首筆資金，房委會會發信通知買家於指定日期內完成交樓手續及繳付樓價餘額，所以在入伙前半年起，要開始準備按揭所需文件，令成個流程更順利。