【收票王魔咒？】「柏傲莊III」「灝景灣」新舊票王 兩個「牛市」

新舊收票王相差24年，97年青衣「灝景灣」開賣萬人空巷，高潮過後就是萬劫不復，「柏傲莊III」可以打破這種宿命？

下載Yahoo財經APP
美股、外匯、加密貨幣免費即時報價，自選投資組合獲取相關新聞提示。

新盤王「柏傲莊III」最後一輪大型銷售收票逾3.05萬票，打破1997年青衣「灝景灣」開賣3.04萬紀錄，成為新票王。即使「柏傲莊III」愈賣愈貴，亦無阻銷情，在剛過去父親節，賣173伙近乎沽清，至少售出169伙。

其實，「柏傲莊III」累售835伙，套現逾122億元，項目三期累計賣2,938伙，佔成個項目近9成單位，套現近360億元，係近年去貨最快新盤之一。

睇返個價，父親節賣嘅單位，價錢唔平，折實價介乎737萬至2,898萬元，呎價18,760至29,037元，整批折實均價24,858元，較首張價單約2萬，加價成24%。

兩個「牛年」，兩個「樓市」

事有湊巧，今年是牛年，上一個收票紀錄要去返24年前，同樣都係牛年嘅1997年，賣嘅係青衣「灝景灣」，兩個牛年，樓市大不同。

「灝景灣」第一期97年6月賣，正值回歸前，樓價處於高位。排隊買樓人龍由銅鑼灣世貿中心排到去紅磡海底隧道入口，非常誇張，係當時全城熱話。

不過，樓價高峰過後，爆發亞洲金融風暴，加埋政府有意推出八萬五建屋計劃谷大供應，香港樓市逆轉，樓價拾級而下。

97年樓市跌浪有幾慘烈？事後孔明，由1997年10月至1998年1月，跌幅32%，再由1998年3月至同年10月，再跌46%，整過跌浪於2003年8月才結束。由1997年第三季至2003年第二季，累挫68%，幾得人驚。

樓市一沉百踩，有灝景灣業主要等番15年後，樓價才返家鄉，所以灝景灣被惡搞叫「浩劫灣」。但歷史會否重演？而家樓市好友當道，無人提跌市，要睇新票王嘅底氣能否打破魔咒。

新票王如何煉成?

何解「柏傲莊III」認購反應咁空前？首先項目本身有鐡路優勢，而香港鐵路新盤買少見少，而發展商為「柏傲莊」設計花咗唔少心思，引入自家研發的專利設備，賣點啱高要求嘅買家品味。

更重要係，發展商為谷起個市，收票上「做功夫」。「柏傲莊III」銷售大致分三組收票A1、A2、B組，如果曾經抽過「柏傲莊」I、II期「粉絲」，可以額外於每組多入一票，換言之，即係一人最多入7票，而I期開賣時都只係最多1人3票，今次明顯增大認購機會，發水成份唔少。首輪已有6成所謂「柏傲莊粉絲」認購。

未來新盤供應唔少

香港疫情緩和，有唔少新盤等出場，下半年香港樓市氣氛要睇新盤可唔可以炒起個市 ，短期會賣有啟德跑道盤「維港I號」（涉1059伙）、火炭站「星凱．堤岸」（涉1335伙），以及元朗站上蓋項目Yoho Hub（涉2000伙），大家拭目以待。