【專家分析】太航股價動力大爆發
【Now財經台】太平洋航運(02343)因為交咗一份靚業績,股價今日逆市炒上,一度高見3.55元,大升近10%。此外,太航又獲3家大行「加持」,其中摩根士丹利估計,太航下半年賺超過3億美元,全年就賺5億美元。
中國通海證券投資策略聯席總監阮子曦指,其實大行嘅預測已傾向保守,如果各國通返關,上游需求將會好大,乾散貨依家只係初期爆發,同埋上游資源嘅建材類增長力可以好勁,加上太航本身槓桿高,所以股價動力可再睇高一線,更估計下一份業績先係盈利爆發力高峰。Harry又話,如果美元唔升,上游資源價量齊升,對太航會有好大幫助。