【專家分析】通脹、息魔夾死美股?
【Now財經台】美國面臨史上首次債務違約危機,美股3大指數噚晚顯著受壓,標指3日內兩度失守100天線,係近1年首見,納指亦再插穿100天線。大型科網股捱沽,其中,Facebook及旗下WhatsApp、Instagram噚晚突然「死機」,股價急跌近5%。依家3大指數失守100天線,美股走勢係咪轉差?
潤淼資產管理董事盧志威指,Facebook死機事件係噚晚跌市元兇,但美股市況轉差同兩個因素有關,聯儲局「收水」嘅同時,通脹率不斷升溫,石油、天然氣等能源價格係咁升,加上歐洲、英國、中國等國家都出現供應鏈問題,喺上游能源不足,下游生產不及嘅情況下,通脹可能蔓延至下游產品,受通脹率可能飆升、聯儲局可能加息夾擊,預期美股未來一段時間都唔會好。