【大茶飯】北水下一步尋蝶(青冰)
青冰早前換電腦,買咗正版的視窗同Office,店員話Office有個版本,係每月付費,可以享有線上儲存服務,如果你係小企業、學校或非牟利機構,仲會有一個優惠的版本,咁無論在手機app或網頁,都可以使用,又唔需要自己買server,又有微軟幫你做保安。大家唔好誤會,青冰唔係推介微軟,而係有類似業務發展的金蝶(0268)。
金蝶係以商用ERP軟件起家,即係企業資源計劃系統,細至公司打卡番工,大至會計賬目,都係屬於ERP。根據財富中國100強企業,有一半都係用金碟,而佢地亦係中小企必然之選。不過身在中國,想靠軟件發達真係好難,盜版的問題嚴重,要破解又方便,嗰啲中小企話必揀金蝶軟件,但都唔肯定係咪正版喎。
所以發展雲端服務就係金蝶的重中之重,因為呢啲無得老翻嘛,企業已經唔係買你嘅軟件喇,係買成套服務。剛公佈的去年業績,金蝶雲ERP業務收入有2億人仔,增長90%,佔總收入一成,大客戶有騰訊、華為同萬科,全部都係龍頭企業,而騰訊(0700)持有21%的全國最大電商京東商城,更加係金蝶的策略股東,兩年前以4.60入股一成,嘩,現價只係七折。
近期最火熱的題材股已經由車股變成科網股,市值二萬億的騰訊可以日日新高,手游龍頭IGG(0799)5日內升三成,連無盈利的美圖(1357)都可以兩周升八成,咁正氣到不得了的軟件股,又有雲業務巨大潛力,你覺得值幾多呢? CCASS顯示北水現持有金蝶1.2%股本,比美圖還多,而上周五金蝶又大成交蠢蠢欲動,難道北水下一隻的喪炒目標係佢?