雅虎香港財經 【大茶飯】合和私有化曲終人散 (青冰)
早前曾提及的兩隻私有化股票，合和(0054)及哈爾濱電氣(1133)均在上周進入另一階段，合和在股東大會投票中，以高票97.9%贊成，通過私有化計劃，將結束46年上市生涯，而哈爾濱電氣亦在上周寄出私有化通函，並定在5月7日舉行股東特別大會作投票，青冰早幾個月曾撰文提過，近年國企私有化的成功率是百份百，且看今次有冇例外。
早兩日David Webb發文談及合和私有化，話私有化價格只係NAV的六折，但結果仍獲大比數支持通過，正反映港股市場的企業管治係幾咁曳，少數股東權益沒有保障，亦沒有好的法規令少數股東可以影響公司決策，從而減低股價長期比資產值大幅折讓。
還記得年初時有報導訪問過「長毛」，佢分享咗自己投資成功的經驗，廿幾年來每年回報達兩成，大幅跑贏恆指。當日同幾位戰友閒談時，有戰友咁講：「頂，條友根本就係靠市場有缺陷而發達，依家上咗岸就經常發文不斷揭發呢隻嗰隻有問題有泡，幫小股東維權而減少市場機會，即係阻住勤力的後輩發達啫。」唔知各位讀者戰友是否同意呢？
好喇似乎扯得太遠，都係講返合和啦。青冰當初都唔太睇好私有化，覺得出價仍然折讓太多喇，未必受基金股東支持，不過持股最大的基金Southeastern Asset Management，手持獨立股東的一成投票權，在較早時已表明支持，而誠哥在1月底時更特意增持咗少少合和股份，令到長和要申報此交易，直接將行動浮面，你話誠哥是有心定無意呢？現在回想，這個咁明顯的舉動，就表達了誠哥支持的訊息，有好多猶豫未決的基金，又或者以前跟開誠哥搵食的市場人士，應該都感受到誠哥那份誠意，投票時亦會識做。
較令青冰惋惜的是，在合和私有化的股東會中，胡生兩父子全無交流，阿仔直頭唔想答記者問題，令到胡生都頗為尷尬，可想而知當日胡生決定要做私有化時，要將父子關係浮面，所受的壓力都幾大，如果今次最終是失敗，真係唔太值得喇。
