【我係邪惡HR】守得秘密先好做HR（HR小薯蓉）

守得秘密先好做HR

唔知大家身邊有冇啲守唔到秘密嘅朋友，對於守唔到秘密嘅人嚟講，太多秘密屈喺個心度，心理壓力會十分之大，無處宣洩之下，最終可能屈到有病。佢地鍾意周圍同人講「靜靜雞話你知」、「唔好話我講」，將秘密爆曬出嚟之後催眠自己冇講過。守唔到秘密，呢個正正係做HR嘅大忌。

入行做HR，除咗要有相關經驗同知識之外，個人性格都係其中一個關鍵。如果我去請一個HR同事，把口守得秘密一定會係重點要求之中嘅重點。點解把口要夠密？皆因HR有太多「不能說的秘密」。

1. 薪酬待遇

公司每位同事嘅薪酬待遇係每間公司最敏感嘅資料，而呢啲資料都係由HR嘅同事去處理。HR每日工作都要接觸到呢啲資料，整間公司每個人嘅人工都睇得到，今個月有邊個升職、有邊個加人工、請咗個新人幾錢人工，全部HR都知。如果人工資料傳咗出去就好麻煩，之前喺某論壇就見過有人講，有員工發現自己人工比人低，做嘢突然變得好Hea，表現極不合作。另外，亦都有好多人介意畀人知道自己每個月搵幾多，薪酬待遇傳咗出去，唔單止HR會畀人捉曬去斬首示眾，直頭可能引起世界大亂。

2. 出Warning或炒人

除咗薪酬福利，公司嘅劊子手行動亦係由HR去準備同執行。由收到部門要求，核實事件、調查、到出警告信甚至解僱信，邪惡嘅HR同事都參與其中。為免引起同事之間無謂嘅猜測，行動前都必需全程保密，直到行動前一刻都唔可以同任何人透露半點風聲。

3. 公司資訊

除咗以上兩種咁嚴肅嘅資料，輕鬆啲嘅部份都一樣要守秘密。例如今年最新嘅活動、新年派幾多錢利是、annual dinner去邊度、年三十有冇得早放，喺應該公佈嘅時間之前，HR同事都要守住秘密先。無論幾熟嘅同事點樣八卦走嚟問你，你都要守口如瓶。傳咗出去冇曬驚喜，鍾意親自宣佈嘅老細一定唔放過你。

除咗呢啲，仲有好多各色各樣不能說的秘密。所以，守唔到秘密嘅人，千祈唔好入行做HR。