【我係邪惡HR】EQ對HR很重要（HR小薯蓉）

【我係邪惡HR】EQ對HR很重要（HR小薯蓉）

記得有一次搭飛機，留意到有個空姐講嘢嘅語氣明顯比較中氣十足，同時動作又大又快，相信佢性格係比較豪邁，撞到人都唔知咩事嗰種。因為係短途航班，飛機起飛之後我就即刻開始把握時間睇戲，就冇再留意豪邁空姐嘅一舉一動。

直到派餐前，通常空中服務員都會先派水，當乘客飲到咁上下，佢地會收返啲水準備上餐。呢個時候我聽到豪邁空姐急促嘅腳步聲，佢正以最快嘅行路速度從我身旁嘅走廊接近中，當佢嚟到我身邊嘅時候，佢背後突然響起另一位空姐嘅聲音叫住佢。豪邁空姐聽到有人叫佢，即時嚟咗個急停，同時做咗一個180度華麗轉身嘅動作，而右手托盤上嘅水亦都隨住佢嘅轉身，華麗咁潑曬喺我身上面。

佢即時大驚，差在未叫出嚟，佢用好後悔嘅眼神望住我，不停同我講唔好意思同拎紙巾畀我抹。唔知點解我感覺到佢應該唔係第一次，而且可能已經畀人投訴過，佢嘅眼神好似想同我講：「唔好投訴我呀！」最後我只係講咗句「OK唔緊要」，可能因為我冇乜表情，佢都仲繼續不停講唔好意思，直到我抹乾曬佢都仲繼續畀紙巾我抺。

我身邊嘅朋友睇到成件事發生過程，全程O曬嘴，當豪邁空姐走開之後，佢問我：

「點解你可以唔嬲嘅？畀著我至少都西西佢面。」

面對呢啲情況係對人EQ嘅考驗，有啲人

可能會西曬面問佢有冇韮菜、有啲人可能會即時爆粗、有啲人會即刻搵佢上司投訴。可能做得HR耐，見得多見工奇行種、嚇死你嘅同事，無論幾好笑或者幾嬲都好，面部肌肉都需要好好控制，情緒亦都一樣。

如果做HR冇返咁上下EQ，喺interview時同求職者出現對罵、遇到投訴就同同事互相鬥寸，邪惡嘅形象就會更加深入民心。影響嘅唔單止係自己形象，亦都係公司嘅形象甚至行業嘅形象。所以做HR，一定要train好自己嘅EQ。