【樓市大時代】陳永傑破頂前沽貨，富豪大手狂買新樓

中原CCL指數就快破頂之際，中原地產高層陳永傑身體最誠實，趁高位沽出荔枝角曼克頓山高層單位，勁賺7球。但有人沽貨，亦有人掃貨，神秘富豪再買入上水古洞新盤「高爾夫．御苑」6伙，香港樓市真係進入「大時代」？

下載Yahoo財經APP
美股、外匯、加密貨幣免費即時報價，自選投資組合獲取相關新聞提示。

不時在公開場合，大力唱好香港樓價的中原地產亞太區副主席兼住宅部總裁陳永傑，身體力行，樓價見頂前，先行沽收租物業離場，三年以來首度出貨。單位係曼克頓山6座高層D室，實用面積538方呎，屬兩房，以1,190萬元易手，呎價22,119元。買入價為485萬元，賬面勁賺705萬元。

曼克頓山租金回報勁跌

佢向外解釋非睇淡後市，而是重整個人投資組合，仍會吼其他收租物業。雖然已解畫，但身體最誠實，是否預視二手樓價差不多到頂?

睇番個盤租金回報，現時成交租金每呎39元，陳永傑嗰單位每月收租約2.1萬元，以買入價485萬元計，租金回報有5%（未計管理費及使費），但以成交價1190萬元計，由於樓價急升，回報率跌至2%，租金回報勁跌影響投資價值。

樓市都有資金輪動

二手市場有人離場，但新盤大把人入場，有神秘富豪再大手買入上水古洞「高爾夫．御苑」6伙分層現樓單位，涉資9,100萬元。

6個單位實用面積由961呎至1048呎，全部為3房設計，成交價由1409萬至1601.58萬元，成交呎價由14,665至16,067元。

富豪看好新界西北及大灣區發展，因而大手買貨，計入早前已購21伙，共買入該盤27個單位，涉資近4億元，令人嘩然。

股市成日有人講資金輪動，由增長股轉向價值股，而香港樓市亦進入資金換馬大時代。對內地人而言，在人幣升值催化下，加上內地樓已累升唔少，港樓變相更平，價值顯現。而其他本地投資者心思思沽出已賺夠物業，套出資金尋找其他投資，都算另一種輪動。