【樓市贏家】代理個個揸靚樓？份首期兩年後先到手（徐峰）

有時見到班地產代理個個身光頸靚，人人全身名牌，手戴名錶，出入有靚車代步，加上可以第一手獲得筍盤資訊，你一定以為個個都手揸靚樓，個實情又不一定是這樣。

如果是早十多年前，你可以這樣認為，因為當是沒有一手新例及額外印花稅等所限制，當時代理要炒樓非常簡單，只要直接跟發展商攞貨，便可優先揀心水筍盤，而且亦不用上會，隨即在市場上放摩亦可以，轉個頭即賺一百幾十萬。

不過自從有「九招十二式」及「額外印花稅」後，新盤禁止在入伙前轉售，而買入三年（初期為兩年）內轉手，需付不同比例的辣稅，莫講是地產代理，甚至是一般炒家都難靠買樓在短期內獲利，再加上一手新例的推出，地產代理即使與發展商關係有多密切，都不能優先揀樓，同樣要與一般客人一樣抽籤揀樓，一樣要靠運氣。

早一年幾兩年，筆者就有一個代理朋友買了一個新盤單位打算收租，早陣子還帶筆者去參觀一下，一個細細一房單位當年買入要700幾萬，都幾貴。

於是筆者就同友人研究，原來當年他買入是已是第三輪推售的時候，當時發展商已加了一定程度的價，所以他這個單位比同類型最低的售價貴接近100萬。

初時筆者問，「你頭兩輪都抽不到？」，但朋友說，頭兩輪推售時根本無打算買，因為當時手頭上資金不足，只是到第三輪推售是，剛好有另外一個大盤「放佣」，才驅使他入市。

地產代理這行業就是這樣，當你以為他們今個月開大盤做了很多生意，下個月就有很好糧金？非也，特別是做一手盤，要到發展商放佣才有糧出，隨時做完成交後一年半載才收到錢，有時如果是長樓花期，可能還要等兩三年。

你可能又會問，如果要靠發展商放佣才有錢做首期，豈不是他本身並不是有錢買樓？非也非也，地產代理買樓最難並不是首期問題，而是按揭問題，因為地產代理並不是一個有固定收入的行業，他們底薪可能只有一萬幾千，要靠這薪金向銀行借錢，幾乎是不可能的事，所以要趁有大筆佣金那幾個月才能向銀行借錢，那位朋友還說，如果做代理又很想買樓，一是趁有佣金那幾個月用即供方式買樓，二是先以建期付款，到有佣金那幾個月即時轉用即供上會，才能夠成功買樓。