【樓市贏家】旺市推唔郁 君豪峰衰乜?(徐峰)
個個都賣樓,唔通個個都賣到樓咩!呢句話,最適合形容四叔上星期推售的鰂魚涌單幢盤君豪峰,樓盤首推的68個單位,開賣當日只是賣出19伙,廿間都唔夠,都算是旺市下的奇葩!
這個新盤,被發展商譽為同系西環翰林峰的姊妹盤,今年5月開售的翰林峰,推出268個單位賣出八成,最高呎價達4萬3,成績都算不俗,但今次的君豪峰,成績就強差人意,由於兩者單位格局相近,點解銷情會差天共地呢?
首先,今年5月翰林峰公布的首張價單,平均呎價大約2.6萬,而今次推出的君豪峰,首批呎價就大約2.4萬,如此比較,君豪峰呎價比翰林峰平約8%,雖然君豪峰都算是鄰近太古坊,相信都會有班青年才俊居住,但撇除佢是否毗鄰大酒店,但始終金鐘、中環、上環才是本港傳統的CBD,承租能力高的打工仔,人數相信比太古坊多出不知多少倍,加上港鐵西港島線通車後,西區才是港島最吃香的地區,若果兩者差價連一成都無,相信都幾難吸引人買。
若果你有追開徐峰的文章,還記得早陣子有講過,現時香港人買家,買的是lump sum,即是說,唔理你間屋幾大,最緊要總價夠平。但今次恒基的銷售卻逆市而行,不以平價的開放式單位作招徠,最細都只推出一房單位,令項目首批單位入場費要680幾萬,相比5月時翰林峰首張價單開放式單位入場費470幾萬足足貴210萬,即接近四成半,在投資者角度,吸引力自然大減。不過,這個策略,不知是發展商真是如此有信心,還是期望一房單位賣得七七八八後而推開放式可以賣貴啲呎價。
講開又講,個個都賣到樓,唔通又個個都想賣到樓咩!其實不少樓市中人都知道,四叔賣樓心態同其他發展商有一個大不同,當人人都期望可以一舖清袋,賣個滿堂紅的時候,四叔反而喜愛「慢慢摵」,不求量只求價,希望賺取最高利潤,你睇天匯到依家仲未售清,但樓價就屢創新高,所以,恒基近年已取代華懋的位置,成為貨尾之王。