雅虎香港財經 【樓市贏家】二手樓點解海鮮價？（徐峰）
買樓前，相信好多人都會睇下報紙，或者上網睇下同屋苑其他單位的成交，睇下現時其他單位賣緊幾錢，衡量一下自己睇緊個單位叫價合唔合理，不過呢，好多時大家都會忘記了，二手單位的保養及裝修其實都好影響價錢。
好似早排我有朋友個媽媽，俾咗200幾萬個女做首期買樓，雖然所買的是一個廿幾年樓齡的華懋樓，嗰個年代的華懋樓出名質素差，又漏水又乜又物咁，不過呢，我朋友睇樓時就見上手業主3年前買入自住，當時就全屋大執一次，全屋所有櫃都係訂做，fit曬size仲非常新淨，大門仲換埋指紋鎖，所以我朋友睇樓時雖然知道比同類單位來講並不是超平價，但計過裝修都可慳返一大筆，但可以慳返好多時間，所以輕輕講咗幾萬蚊價就買了。
不過呢，在落曬訂但未收到樓期間，阿伯友幾乎每隔幾日就會問我朋友一次，我見樓上個單位平你廿萬喎，點解嘅?點解你樓下個單位仲貴過你嘅?點解點解點解……筆者心諗，你問咁多又點呢?知道買貴咗你係咪會撻訂丫?買平咗你又唔會俾返錢個業主。
當然我朋友招架不住，就揾我求助啦，而當然實際情況係點，筆者都唔會知，因為買二手樓同一手樓唔同，一手樓所有單位交質素差別不大，但二手樓，仲要幾十年樓，住得唔好真係可以好殘，好似我朋友買個單位，齋睇內籠真係以為佢幾年樓，樓價當然會貴過同類但殘裝單位一截啦。
而更重要嘅係，一手樓全部由同一發展商推出，在同一張價單內同一類單位，價錢係點可以直接比較，但二手樓由唔同業主出售，個個業主心態唔同，個個買家講價功力亦都數一樣，所以就算同一樣的單位，二手成交價都會有分別，所以呢，睇市場成交其實只可以作參考，唔可以用人地個單位賣幾多，就等如自己個單位值幾多。
=============================================
