【樓市贏家】90呎唐樓上車 執到寶?(徐峰)
雖則近排個市好似回咗少少,好多屋苑都有減價成交,好似嘉湖山莊兩房重回500萬樓下,沙田第一城兩房都跌返落500萬就有交易。不過,香港樓價仍然貴到飛起,有心急人為求上車,幾十萬買個得90呎嘅唐五樓劏房,簡直係香港人嘅悲歌。
可能近排比較多新盤推出,又或者大家都較為關注大型屋苑買賣,有一單唐樓成交大家都覺得唔係好起眼,但筆者就覺得,其實都幾辛酸。話說上個星期市場有一單買賣,講緊係一個荃灣唐五樓單位,成交價四十幾萬,呎價大約五千幾蚊,望落好似好抵住,啲報紙仲話係平絕香港私樓。
不過睇真啲,呢個單位實用面積只有90呎,即係話只係比水飯房大少少,再睇吓市場流傳呢個單位條片同啲相,一行入屋全個「單位」一眼睇晒,一張邊放張三呎床,另一邊全部雜物,仲要因為單位實在太細,雜物要向高空發展,即是話你瞓喺度向上望,頭頂全部係雜物,而整個單位只有一條巷仔,兩步行完。
雖然單位都有廚房同廁所,但開放式廚房基本上同個所謂嘅廳連為一體,床頭位隔塊玻璃就係廁所,而整間屋除咗廁所之外(呢個抵讚,竟然唔係黑廁),就得廚房有一隻窗仔。再睇清楚啲,成個單位可以用殘舊來形容,窗邊、牆身、天花唔只甩油咁簡單,直頭有裂痕,啲電掣插滿一嚿二嚿,睇到都驚爆炸。
到底咁嘅單位咩人會住?話說呢個單位依家租緊出去,月租3500蚊,而新業主聽講係一個廿幾歲後生仔,阿媽俾錢上車,雖然就唔知要嚟住定收租,但其實,呢個阿媽係咪真係心急到咁樣,咁嘅單位都俾個仔上車呢?可能佢都係一位「羊太」,日日見到啲靠父幹靠母幹嘅後生仔買樓,又怕遲啲仲貴,但自己錢又唔係多,所以點都買住個單位俾個仔先啦。
講起90呎單位,本身呢個數字已經夠晒嚇人,但低處始乎未算最低,早排話愉景灣有個新盤,部份單位面積得40幾呎(呢個係跟屋宇署個數,即係唔計廚房廁所),講真,放完張床放個衣櫃都無晒位了,真係起嚟俾人住的嗎?不過呢個盤都有啲幾千呎嘅屋,啲幾十呎其實係咪真係獨立單位?定係拆個工人房出嚟?就真係要等發展商公布先知喇。
=============================================