【理財思考】你儲唔到錢 元兇可能係你份工！

後生仔儲唔到錢，廢中、廢老們都會認為因為太大使。不過大家回顧一下自己打工歷程，揀錯工的話，即使你出力慳都會無錢剩。如果你面對儲唔到錢煩惱，可以留意以下三項訊號，從而考慮是否需要轉工。

流放邊疆

現時新界人口突破369萬，按此估算有過百萬名打工仔每日需要出城返工。出城返工並非大問題，不過如果你選擇位處「邊疆」地區的公司，付出倍數計的車費就後患無窮。以「返工地獄」數碼港為例，一名家住天水圍的打工仔，先搭港鐵由天水圍到堅尼地城便要27.9元，再轉小巴又要6.5元，每日來回車費高達68.8元。而且要留意這條只是基本數，有時放工人太倦或趕時間，你又可能寧願與同事夾錢搭的士，由數碼港到上環就要約70元，四人同行你都要夾17.5元。假如你不幸地是流放邊疆的一份子，即使你領取比下有餘的萬五元人工，面對交通費消耗戰，你很快會發現想儲錢都有心無力。

無間OT

日本職場已持續出現OT過勞死事件，提醒我們無間OT並不是代表你有心又勤力，而係對「被奴役」欠缺警覺性。OT之害除了傷身傷神必定無補水唔一定有補鐘，更附帶大量隱藏開支，令長年無間OT的打工仔要被迫為份工倒貼。

第一項隱性開支係開飯，返工加時意味你要在公司解決晚餐，叫外賣或落街買飯盒都係錢，加上埋頭工作你可能忘記致電回家拜託阿媽留飯整便當，於是第二日又無飯可帶，如此構成惡性循環，你每月付出的打工餐費即會倍增。

第二項係交通開支，假如OT至八、九點可以逃跑，你還有「正常」交通工具可搭，但無間OT至凌晨時份，你需要改搭通頂巴士甚至豪搭的士，如果公司沒有津貼，又或申請手續關卡重重令你懶得搞，每月付出的超額交通費，亦可能剛好蠶食你原本可以省下來的收入。

現時商業區食晏入場費至少50元，令被迫成為老細「飯腳」的打工仔返工成本大增。

團隊文化

外國有管理學專家指出，做團隊領導首要條件係適應孤獨，因為每日強迫手下陪自己是很令人討厭的行為，甚至會嚇跑出色人才。可惜部分本地企業團隊頭目仍抱著「家長」或「大佬」心態，偏好強硬鼓勵手下一同外出食晏，並暗地為帶飯下屬「唔識做」行為扣印象分。

假如你身處這類團隊，為避免被上司及同事邊緣化，可能都別無選擇成為上司的「飯腳」，要知道現時商業區食一餐像樣午餐入場費已過50元，如果上司熱愛假日搞聯誼活動，職場應酬支出又多一筆，要儲錢便難上加難。

當你發現自己中了上述兩項或以上的時候，你不妨想一想工作的初衷無非係賺錢，當返工不斷消耗你大半收入時，你就係時候思考投入的時間、心力及資本是否物有所值，確認只會繼續「蝕」的話，便要果斷策動轉工了。