【異動尋寶】三件2月份要關注的事（魏力）

「個市回得好急呀，係咪散水喇？」

「個市回得好急呀，係咪散水喇？」這個問題昨日收到不知多少次，以週一（29日）高位（33484點）至昨日低位（32612點）計，唔夠兩個交易日，恒指就回咗872點（2.6%），但對比1月份的最高升幅（11.9%），回調幅度只屬溫和。就算以黃金比率最低消費0.236去計，也可回試32221點，即係仲有幾百點要落。

國指今個月升幅更誇張（19.2%），回調幅度自然更多，以週一高位計已落番4.3%，但聰明的讀者應會發現，恒指、國指均是回調升幅約20%，有秩序調整、消化一下早前的超買，對後市延續升勢更為有利。

揸重貨見個市一跌，個心當然戚戚然，「早知高位食咗佢啦！」但人是無水晶球的，永遠不知道高位在哪裡，懶醒去估頂，多數miss得仲多，轉頭買咗第二隻又中伏，比比皆是，魏力多年來也試過無數次。數學叻的戰友都識計呢條數：如果每次執10%，一路搭上去，唔使10個交易日，就可以將本金翻一番。真係得的話咪好快買車買樓兼退休？這個想法不是夢想，只是幻想！魏力炒咗好幾年，結論是：要每日跳出跳入之餘，又可以大部份都賺錢，絕對難過牛市揀龍頭股，然後坐定定等佢上。

展望2月，要留意幾樣事情：一、美聯儲新主席2月上任，屆時會否發表較鷹的言論（加快加息步伐），對美匯指數以至港股均十分關鍵。二、農曆新年關係，北水南下將由2月13日起暫停，直至2月22日才恢復。過年前北水會否減貨獲利？也是影響後市的重要因素。三、恒指公司將於2月6日季檢，並一併檢討綜合指數，市值逾50億元的綜合指數成份股，有機會納入港股通名單，屆時或掀起一輪炒作。

筆者為證監會持牌人，未持有上述股份權益。

www.facebook.com/2012jason