【異動尋寶】個市仲有無得彈?(魏力)
港股挾完一轉,無驚無險,又到結算。恒指圖去睇,截至週三(29日)為止,本月恒指仍然要跌,但總算守住20月線及100週線。翻查資料,恒指在2008年3月及2015年7月失守這兩條線之後,均出現較大幅度的反彈,但當然,重點是之後會再度尋底。
以2015年7月為例,恒指由低位22836起步,回升至25634點,幅度12.3%。再看遠一點,2008年3月,恒指低位20572,反彈至5月高位26387,勁彈28.3%。大家都想知的問題是:今次可以彈幾多?簡單講,上兩次係狂牛,今次無癲過,全程慢牛格,自然唔會彈得咁勁。舉個例,你拎住個西瓜波,舉高跳起再大力掟落地下,同你「係咁意」掟落地,個回彈力度都唔同吧!
所以,假設用12.3%作為本輪反彈的頂部(雖然魏力都覺得幾難),恒指可見30176點。非常巧合地,用黃金比率反彈0.5去計(33484點跌至26871點,再反彈跌幅一半),數值為30177點,兩者只差1點!比較合理用0.382去計,答案則是29397點。
再配合牛熊街貨分佈去睇,散戶仍然係博熊唔博牛,呢幾日殺完一大批之後,熊證街貨仍佔58%,重貨區為28800至28849,以及29100至29149點。如大戶有心劏哂佢,屆時亦已頗接近0.382的反彈比率,宜積極減倉戒備。
www.facebook.com/2012jason