【異動尋寶】吉倉迎2018 家陣點算好?(魏力)
新一年先祝戰友們贏到開巷,心花怒放!每逢年尾,沽貨食糊減磅乃係指定動作,特別係2017年,除了11月尾隊咗一浸之外,幾乎由頭升到尾,清貨去旅行玩餐飽,正常過正常。2018年第一日,大家都仲未回魂,恒指就挾到上太空,升到上30500,創十年新高。假如閣下無貨在手,to chase or not to chase,that is the question。
回答這個問題,魏力會從三個層面分析:心態、選股、注碼。心態最關鍵,先講一下。普遍股民心態係:沽完之後低位買番,無難度,仲覺得自己係天才㖭!但係掉番轉,上個月沽完,今日個價比你沽貨價升咗10%,要你追番幾乎是不可能的任務,「其實唔係買唔起,但總係過唔到自己個關囉,等佢回番啲先喇!」呢句係咪你心底話?
不過請細想,沽早咗已成既定事實,不應該成為判斷「追唔追番」的考慮因素,你要考慮的是「佢走勢如何?行業前景如何?會唔會再升?」特別是已創新高的股份,樓上零蟹貨,牛市持續之下,再創新高的機會是十分高的,就算要高追,why not?
的確,破除高追的心魔是很困難,但如果你克服到,就成功了一半。第二樣是選股。留意番,恒指已創十年新高,但國指莫說2007高位,距離2015大時代15000點仍有2成差距。咁弱雞主因去年石油、基建、銀行股均表現麻麻。但今年要再上,石油、內銀必定要重拾雄風先得,要建倉先落注呢兩類股份,包括建行(939)、工行(1398)、中石油(857)等。
最後講注碼。「升咗咁多,會唔會接火棒㗎?」投資角度來講,買不買股票都有風險,唯有靠注碼控制。目前升浪之中,驚買完就跌,唔買又再升,最好做法是分注買,先「落口釘」,入咗局先,之後回你有注碼可以加,反之一放絕塵的話,你至少有一注在手,就係咁簡單。