【異動尋寶】明年中國經濟 望實兩個數字（魏力）

臨近年尾，中線操作仍然有，但短炒就可免則免，一來成交縮、市況飄，好易左右連環摑，二來近年主力都係買中大型股，如今大戶都執完倉、放聖誕假去了，何必仍然戀戰，炒來炒去博一蚊幾毫？2018年只剩幾個交易日，最緊要唔好「臨尾香」，想追回報？出年望吓開局咩環境再出手吧！

宏觀方面，市傳中國將明年經濟增長預測降至6%至6.5%，究竟有幾大把握？中學有讀經濟的話，都會見過一條公式：GDP = C（消費）+I（投資 ）+G（政府開支）+(X（出口）-M（進口）)。逐件分析下，其實不難估算。

最簡單就係睇進出口，中美貿易戰打咗半年有多，中方處於下風，要作出妥協增加進口；另外關稅影響下，2019年出口應會有所下降，兩者一加一減，貿易淨額必然下跌，對GDP不利。另一方面，如人民幣「保7」，出口壓力難以紓緩；反之，如7算失守，勢將引來人仔新一輪貶值壓力，並令通脹升溫。

政府開支方面，要睇明年中央去槓桿的決心，若然是「穩經濟、穩就業」行先，放水是少不免，政府也要加大基建投放（但當然不會像2009年般大水漫灌） ，因此這部份明年應有平穩增長。

投資方面，今年固定資產投資增幅持續放緩，比GDP增幅還要低，這明確顯示多個行業的產能過剩，加上經濟處於下行階段，汽車、內房兩大支柱產業則表現欠佳，明年頂多是低位橫行，難見可觀升幅。

最後是消費，這仍是魏力比較看好的一環。今年經濟唔好，民眾節衣縮食一定有，消費升級看似變成消費解級，但其實內地人只是將消費由線下轉移至線上，一來方便，價錢也較相宜（少了舖租負擔），來年隨著消費模式進一步改變，加上5G逐步邁向商用化，線下零售基本上生存空間有限，但網上消費的增幅料仍可觀，成為明年能否「保6」的關鍵。

總括而言，人民幣「保7」、GDP「保6」，是明年中國經濟的兩件大事。

www.facebook.com/2012jason