雅虎香港財經 【自願醫保】保險公司「標準計劃」平貴相差三倍 揀Plan要睇三樣嘢
自願醫保（VHIS）於四月一日出台後，多間保險公司均推出自願醫保產品。不過一如手機平貴差距極大，自願醫保「標準計劃」平貴可以相差三倍。想精準揀Plan就要留心三樣嘢。
價錢要「靠譜」
自願醫保其中一項賣點係價格具透明度，因此在自願醫保官網上已提供各大保險公司自願醫保計劃的價目表。比對價目表便會發現市場上的自願醫保基本計劃價錢平貴差距都唔細，以投保年齡25歲男士為例，最平的保泰保費只需$1332，最貴的三井住友就要$4104，兩者差距達三倍。
中、高齡級別亦出現同樣情況，以投保年齡45歲男士為例，最平的保泰保費為$2688，最貴的三井住友保費達$6588，兩者相差2.45倍。至於投保年齡65歲女士，最平的保泰保費為$6876，最貴的利寶國際就要$21028，兩者差距達三倍。
現時最貴及最平的自願醫保，供應商都並非熱門選擇。不過即使名氣大的保險公司亦有一定差距，以投保年齡25歲女士為例，宏利保費$1973，中銀人壽就要$2803。想知睇中的自願醫保Plan收費是否「靠譜」，亦可以比對平均費用，例如25-29歲平均保費為$2300；45-49歲平均保費為$4800；60-64歲平均保費為$9800，若保費與平均數爭一大截，就意味收費脫離市場現實了。
勿忽略公司實力
企業以超平價吸客，主要目的都係盡快搶佔市場。自願醫保亦不例外，所以保費特別平的保險公司，通常都係市場新手，例如保費明顯較平的保泰（Bowtie），其實是一間以純網上銷售保險為賣點的初創企業。雖然公司都設有客戶服務中心、客戶服務熱線及索償助理，在服務配套上與一般保險公司睇齊，不過資本實力就明顯較為遜色。即使保泰首輪融資額達2.3億元，資本實力與市場上的保險巨企仍有大段距離，如果想穩陣一點，就不宜單純睇產品價錢，還要比對一下各保險公司的資本實力，又或是否有具實力的母企支援。
留心計劃優惠
市場上的家居寬頻Plan，電訊商拋出的定價是一回事，計算折扣回贈優惠後個數就係另一回事。自願醫保亦有類似情況，例如近日在電視大賣廣告的友邦，睇價單友邦自願醫保定價算係中價水平，不過在6月30日前投保，就可享全城最低價保費回贈，即是按市場上同類產品最低收費為準，把差價於續保年度的保單回贈予客戶。
想即時有得平，則要留心自願醫保產品的折扣優惠。例如宏利就推出九折限時優惠，在6月30日前成功投保，即可享首年保費九折優惠。連續兩年保單未有提出索償，更可享最高達16%健康折扣。想幫另一半及家人買自願醫保，不妨留意保險公司提供的家庭折扣優惠，例如信諾就提供10%額外折扣。如果唔太想與保險代理見面傾保單，可注意保險公司的網上服務配套，例如是否設有網上投保及申請索償的渠道，不過無保險代理詳細講解保單，你必須花時間自己消化一下產品資料才作出投保決定。
