【花見2019】去日本賞櫻之錢銀規劃（盤川篇）

一年一度日本賞櫻花期又到，在你出手訂機票前，不妨先考慮一下花見之旅的錢銀規劃，今次先講盤川部署。

勿衝動做「負遊族」

要策動賞櫻之旅，最基本條件係錢，每年賞櫻熱潮都會觸發某些人借錢去旅行。別以為只有年輕人才會借錢旅行，唔少家庭負擔重的中年人為了家人高興，都會用借貸補貼盤川，內地網民稱這類人為「負遊族」，即係去一轉旅行就成為負資產。

假如你都有此打算，不妨思考兩件事。一是賞櫻虛榮有「通縮」趨勢，借錢赴日賞櫻，你其中一大目的都係影幾張花見相或拍直播，在社交平台引來朋友的羨慕讚好。但每年花期賞櫻相及短片在社交平台排山倒海放送，大家都睇到厭，你再分享換來的正面反應及虛榮感只會大打折扣。二是旅遊債無限loop，睇到賞花盛放，固然會令你心思思再搞紅葉之旅或滑雪之旅，看不到櫻花滿開，你唔忿氣幾個月後又會想再策動遊日，自然成為舊債未清又借新債的導火線。

既然做賞櫻「負遊族」代價與收穫未成正比，缺水的朋友就不宜衝動行這一步了。

規劃行程 預算先決

大家通常都會參考開花預想表來規劃行程，並按路線順便揀酒店、旅館及心儀的餐廳。不過純觀光、享樂先決的規劃方式，很容易令行程越plan越豪，須知道日本豪華的溫泉宿及酒店，一晚住宿閒閒地二、三千港元，豪住多幾晚，旅費總數很容易會倍數增長。

針對此問題，最好先訂每日行程的預算，規劃行程及選擇酒店時，就按每日預算作出調整，從而避免旅行超支。

掌握兌Yen時機

去一次賞櫻可能要十多廿萬Yen盤川，日Yen價忽然急升，兌換成本已差一截。考慮到日圓仍是熱門避險工具，每逢股市急挫時，資金又會流入日圓，所以準備到日本賞櫻的朋友應該趁近期環球股市有牛氣把握兌平Yen機會。

捕捉匯價，有人會教路用銀行理財戶口以電匯方式兌Yen以賺取更抵匯價。此方法雖然可行，但提取現鈔先要聯絡銀行留錢再到銀行排隊，排隊時間可能較到找換店更長。想簡單一點，倒不如直接到銀行及找換店換Yen，值得一提係激烈競爭之下，部分銀行及找換店的兌換價已與人氣找換店相差無幾，所以事前做好比較工夫，就不一定特別到人氣找換店排長龍了。

銀行 / 找換店Yen價比一比：