【魚樂無窮】港股升勢慢好過快(唐牛)
港股再創紀錄!雖然騰訊(700)急挫逾2%,但在滙控(005)造好下,恒指埋單微升46點,締造13連升佳績,史無前例。升勢由2017年底延續至2018年初,睇真啲恒指實際升幅只有1,886點,扣除紅盤日大升近600點,大部份時間單日升幅只有數十點。咁究竟係好事定壞事?掉番轉諗,如果日日爆升幾百點,有冇機會連升13日?板塊有冇可能輪流炒?答案似乎已寫在牆上。
噚日在友報推介港交所(388),隨即見到戰友留言,但清一色表示早沽了,或者未買到貨云云。無他,港交所自從2015年爆煲(我覺得形容得好貼切)後,一直處半廢狀態,有波幅冇升幅,突破有假冇真,無怪乎戰友們都唔敢亂嚟。不過,今次由特首親自開腔叫馬雲將阿里巴巴搬到香港上市,震撼程度及作用肯定勁過李小加長篇大論多多聲,所以我雖然對呢隻股票冇好感,也要硬着頭皮掃貨,300元大關指日可待。
另一隻曾推介嘅GO股鎮科(859),昨日股價終於正常化,升穿GO價2.4232元,相信與今日為綜合文件deadline不無關係,執筆之時仍未見有新消息,但如有一齊在GO價樓下入場的話,已立於不敗之地,在要約期內繼續等佢爆一轉吧!
唐牛fb專頁