【魚樂無窮】股王腳軟買定唔買?(唐牛)
恒指半個月跌足兩千點,看似誇張,但其實今年累計升了8,000點,從這個角度出發,又似乎合情合理,只是速度之快,殺大家一個措手不及。講過好多次,要博最後一段既急且勁嘅升幅,就預咗要捱一刀,只要計好數,懂得及時走避,賺嘅幅度一定夠cover蝕那part,除笨有精。
市面上十居其九的問題,都圍繞住騰訊(700)。「撈唔撈好呀?溝唔溝好呀?」我只可以話,你信騰訊神話未完嘅,任何時候都係買騰訊嘅好時機,而家股價跌咗落嚟,吸引力更隨之上升。跌又唔敢撈升又唔想追嘅話,我估你一世都買唔到呢隻股王。記住,分段吸納可以幫你踢走心魔。
至於圍繞住騰訊的新經濟半新股,近期走勢明顯轉弱,其中易鑫(2858)穿底後越跌越有,較暗盤價高位蒸發近半,閱文(772)亦逐步回補上市後的上升裂口,雷蛇(1337)最近亦失守招股價。都係那句,如果信新經濟概念嘅,騰訊始終係最好嘅選擇,起碼有多年嘅track record呀。
講開新經濟股,近日創業板股中國信息科技(8178)宣佈,研究收購MTGamer品牌不多於51%權益,進攻線上電競比賽平台,並提供有關電子競技及遊戲廣告的資訊,概念某程度上比雷蛇做硬件如mouse及keyboard件更佳。當然,收購只在MOU階段,不妨等有進一步消息再作打算,現階段宜先觀望。
唐牛fb專頁