【精明理財】自願醫保係乜？買開保險仲使唔使買？

自願醫保將於4月1日出台，為醫保產品做勢，保險公司積極公布關於醫保的調查，其中一項調查指出有四成港人無買醫保，當中包括月入五萬的中產人士。當你抱著「那有錢」心態看待自願醫保，就要留意一項世界第一指標。

對沖病債風險

該世界第一指標就係早前令不少港人苦笑，由經濟學人智庫公布的全球生活費用研究報告，香港升三級與巴黎、新加坡並列全球生活費最高城市第一位。

生活指數領先全球，令唔少人唔多願意供醫保。但正因為生活成本貴，大家更要提防大病風險，因為大病來襲，沒有醫保補底，你便焗住要動用儲蓄再舉債擊退病魔，大病過後，又要為踏上還病債長路。

另一原因係上班族習慣使用公司提供的醫保，認為額外買醫保係多餘。單計門診，有公司醫保支援在指定診所睇醫生每次只需要補幾十蚊實在筍，但遇上大病入廠，團體保單債付比率只有66%至76%。更大風險係被裁走或轉工空窗期遇上大病，就失去公司醫保保障。雖然失業率正值歷史新低，但職位日趨散工化，大企業搞一搞重組，你都可能要起身，所以不能輕視空窗期風險。

未買醫保的朋友，雖然醫保唔係強積金，買唔買係閣下「自願」，但自願醫保出台，不失為一個好時機諗一諗投保。即使有人批評自願醫保無乜大突破，但保證續保、不設終身保障限額、保費具透明度、保障涵蓋未知疾病及先天性疾病都有一定吸引力。而且保險公司及銀行為了搶這塊大餅，都可能陸續推出優惠，為想上車買醫保帶來更多甜頭。

自願意保賣點：

至於已買了醫保，但對張保單唔太滿意的朋友，亦可以留意一下自願醫保產品。除了因為自願醫保有續保至100歲保證及不設終身保障限額，每年42萬元保障上限，即使你用盡，第二年都可以繼續享有42萬元上限。而且自願醫保設有加料版「靈活計劃」，想轉Plan的朋友，可以比較一下保險公司推出的自願醫保靈活計劃的加碼範疇及收費才再作決定。

自願醫保由於唔係強迫， 加上初推出時保險公司在優惠上可能留一手，四月一日後大家不妨先等各大保險公司吸客優惠出台，再比較市場上自願醫保收費、優惠及網上投保及索償支援等條件，篩選出最適合自己的自願醫保計劃，減少上錯醫保車風險。