一萬蚊購物指南
市民陸續收到政府派發一萬大元,自然心動不如行動響應財爺呼籲出擊消費。不過精明購物講時機,唔想中伏就要留心一萬蚊購物宜、忌類別。
忌平霸二手車:
忽然多一萬蚊閒錢,可能唔少人會想入手幾萬蚊的平霸二手車。但賣家瞄準人同此心商機,近來已積極將平霸車封盤。到熱門的二手車交易平台都會發現幾萬蚊二手車盤源急跌,估計係賣家攜手製造供求失衡情況,下一步就係加一、兩萬蚊搏心急買車人士高追。所以唔想貴買,倒不如等待「一萬蚊買車潮」過後再考慮。
除了二手車,日本二手水貨車都係買車新手的熱門選擇。但參考過去經驗,每逢雨季都係日本二手「水浸車」貨源襲港的旺季。「水浸車」係指架車浸過後執得企企理理當二手車水貨車賣,睇車時正正常常,但揸了一輪就發現問題多多。近日九州熊本出現大水災,大家趁手頭鬆動趕買水貨車,一不留神就可能買了「水浸車」。
忌iPhone:
iPhone係有意外之財獎勵自己的熱門選擇,但現在到七月買iPhone時機相當尷尬,皆因傳統到九月蘋果就會發布新機,上一代機款身價即時大縮水。雖然之前有傳蘋果會推遲開售日期,但生產商早前又強調可如期生產,加上新機資料近期已排山倒海湧現,預計iPhone如期發布機會唔細,而且今代仲支援5G,假如心急用一萬蚊入手iPhone,兩個月後你就可能恨錯難返。
忌Macbook系列:
用開配置butterfly keyboard的Macbook系列的朋友,今年或許早已計劃換上手感回復正常、配置剪刀式結構鍵盤的新Macbook系列。但如果你部Macbook,特別係入門級Macbook Air仍然壯健如牛,即使手持一萬蚊都應該忍一忍手。原因係早前蘋果公布未來Mac系列會採用自家研發ARM架構Apple Silicon,而放棄沿用多年的Intel出品晶片,意味Macbook系列都會面對一個轉換晶片過渡期,手頭部機行得走得,就不如等埋採用蘋果自家晶片Mac系列效能再決定。
宜機票:
今年去到七月唔少熱門國家都未去得,即使可以去都擔驚受怕,現在買機票似乎好傻。但正因為疫情,現時唔少航空公司都提供靈活更改出發日期安排,例如HK Express「靈活飛」就可以在出發前三小時無限次免費任改行程,現在訂十二月去大阪來回五舊水有找,當買個出發「希望」都抵。
宜考牌:
經濟唔好最宜學一技旁身,除了最熱門的考車牌,水電牌都係香港長年缺人的搵食技能。就以學整水喉為例,先去讀平安卡課程學費只係140元,再上埋水喉安裝證書課程學費約一萬元,仲可以申請CEF幫輕學費。為搵食甚至為移居外地,都係性價比高的投資。
宜買口罩:
新冠肺炎又重新在港爆發,如果前排口罩停入一排,係時候趁低吸納。早前日本app開發公司Astool調查主要網站口罩價格,揭口罩售價跌破10日圓(0.7港元),早已與高鋒相去甚遠。中國製口罩現時約50蚊一盒就有交易,但隨著廠商認為產能過盛陸續停產,新一波錯估市場需求,隨時令口罩價錢谷底回升。
宜儲Lego:
疫情期間限量版Lego抗跌力更勝藍籌股,有一萬元在手,動用小部分入手限量版,可留意新公布將推出的兩款產品,一是電影《Home Alone》場景,另一款是《Seinfeld》三十周年紀念版。兩部作品多年來全球儲埋海量fans,成功入手升值潛力高,值得一搏。
===============
精選資訊網站「中環街市」 臉書粉絲頁