不似預期|綠債暗盤潛水 每手賬蝕$45 唐牛不沽等收息 杜昇:唔會蝕住沽
由政府推出的首批綠色零售債券(4252)明日(19日)掛牌,個別券商今日(18日)開放暗盤交易,惟暗盤價出現跌穿100元發行價的情況,或創歷屆政府發行通脹掛鈎零售債券以來最差的暗盤表現。
暗盤最高只見102元
據富途暗盤顯示,暗盤一度閃見102元,惟成交不多,收報99.95元, 每手帳面蝕5元;耀才暗盤方面,綠債開市報100.1元,高見101元,收報99.95元,每手同樣帳蝕5元;至於輝立暗盤開市則報100元,最高見100.05元,曾報99.55元,每手帳蝕45元,收報99.65元。
對於綠債暗盤「破發」,一眾連登網民紛紛留言「抽綠色債券都要割韭菜?」、「債券都有得人踩人」,亦有網民指「唔孖嘅話冇嘢要驚」。
美股專欄作家杜昇今次亦抽中4手綠債,他指若要蝕沽,則寧願等收息,「難得成手現金,所以就買綠債玩吓,唔會蝕住咁沽,反正啲資金冇其他用途,就等收息。」他又指,「綠債冇諗住賺好多,target唔蝕錢就可以」。
唐牛:沽出與否視乎心態
獨立股評人唐牛則指自己也有5手綠債,現時不會沽,會等收息。「我自己有兩手準備,抽個陣已經聽到其他人話今次冇上次iBond反應咁勁,所以有心理準備冇得即日炒,我計過一年有兩厘半息,5手都有1,250蚊,好過做定存,所以會拎嚟收息。」
至於其他投資者,唐牛指要視乎自己的資金狀況,有些人心態只是博「短炒」就建議沽出。「你心態係抽新股,贏唔到咪走咗先。但你如果有閒錢可以坐,咁就坐住先,所以好視乎你自己資金狀況而定」。唐牛笑言,即使今次沽了,最多只是輸數十元,「睇番BossMind午市幫拖,跟古天后贏番啲錢返嚟咪得」。
對於綠債暗盤跌穿發行價,有市場聲音認為,雖然保證回報為2.5厘,但近月美國加息的背景下,美國10年期國債孳息率已一度升至3厘以上,不少港元及美元定存亦已升至2厘以上,因此削弱其吸引力。
是次綠債發行額度為200億元,年期為3年,一手入場費1萬元,派息率與通脹掛鈎,保證回報2.5厘,每半年派息一次。今批綠色零售債券收到逾48萬份有效申請,涉及本金總額逾326億元,全部有效申請均可獲配發債券,最多則可獲5手。
密切留意BossMind動向!立即CLS
Powered by Mercury