【人壽保險】居危思危 定期壽險早買早安心

當打邊與同事食晏都可能中肺炎，你或會開始憂慮忽然過身屋企人的錢銀煩惱，這時候你應該要考慮入手過去一直忽略的人壽保險。

定期定終身好？

人壽保險最重要的功能，係當投保人不幸過身後能夠獲發賠償，減輕投保人家人的經濟負擔。假如你從未買過壽險，搜尋一下市場上相關產品資料時，都會留意到通常分為定期壽險及終身壽險，咁究竟買邊隻好啲？

聽起來似乎終身壽險保成世會吸引啲，不過凡事唔可以睇表面，終身壽險存在兩項弱點，首先係保額較定期壽險低，其次係終身壽險通常附加儲蓄成份，所以保費會較定期壽險貴，亦因為帶有儲蓄成份，假如你半途斷供，取回的保費就會少一大截。

如你自問在儲蓄投資上有更好的選擇，就不如化繁為簡兼目標為本，選擇具備槓桿比率優勢的定期壽險。定期壽險雖然沒有儲蓄投資成份，但好處係以實惠價錢獲得吸引的賠償保額。現時市場上的定期壽險年供二千元已獲得約50萬元保障，雖然定期壽險保障期設有歲數限制，不過只要你趁年輕投保，定期壽險仍是你退休前有效的人生保障。

至於選擇保額，最好按每月開支及支付家計年期作出估算，假如係正在供樓的雙職家庭又未有子女，亦可以考慮以物業供款餘額作為估算保額的基礎。

揀計劃須留心增值優惠

揀定期壽險毋須像政府搞採購般價低者得，大家都懂得除了睇價錢，亦會比較保險企業的品牌及服務風評。想揀中性價比高的定期壽險，你亦要留心壽險計劃附設的增值優惠。

首先係支付保費選項，通常定期壽險會提供月繳、半年繳或年繳選項，亦有一些計劃只提供年繳選擇。如擔心年繳保費會影響該月現金流，就可以選擇月繳或半年繳方式支付。

其次係財政支援上的靈活度，例如有定期壽險計劃提供意外完全及永久殘疾保障，如投保人因意外導致永久殘疾可獲10萬港元一筆過賠償。此外不少計劃會提供預支賠償支援，當投保人確診患上絕症及剩低日子只有12個月，即可獲預支身故賠償，讓投保人更有彈性籌謀身後事。

最後兩項實際考慮係抗疫支援及投保方法，有抗疫支援自然可以即買即獲最急切擔心的保障。至於投保方法，主要係買保險是否必須與經紀電談或見面，雖然聽經紀講解，可以幫你找到適合自己的計劃及保額，但確實有些人唔太願花時間聽經紀講解，如果你屬於後者，就可能要優先考慮可以完全在網上搞掂投保程序的定期壽險計劃了。