【全民派錢】政府派一萬 點拎點用先有「So」？

財爺公布派錢一萬計劃將於6月21日起接受申請，想把握此難得機遇賺多啲甜頭，便要好好部署登記及運用策略。

抽獎 VS 即獎

全民派錢是難得的「盛事」，加上透過銀行登記係最快收到款項方式，銀行自然會樂意提供登記優惠。

綜合現時多間銀行提供的登記優惠，主題離不開「抽獎」及「即獎」。先講「抽獎」，由於今次政府係派發一萬元，多間銀行「抽獎」均以一萬元為賣點。恆生、渣打、大新及東亞，客戶透過網上銀行或理財App登記後可參加抽獎，大獎為一萬元現金獎。工銀亞洲「抽獎」重點則放在推薦，客戶推薦一名新客戶登記可參加抽獎，贏取最高一萬元現金回贈。

至於「即獎」，最觸目首推虛銀眾安銀行的「萬一」獎賞。玩法係在6月15日前使用「WANT11K」邀請碼開戶，開戶後14日內以個人專屬邀請碼邀請兩名朋友開戶即可獲400元現金獎，之後再成功登記及領取一萬元即可獲額外600元現金獎。不過眾安獎賞於每日三時發放有限登記名額，而且距離截止只有幾日，要完成登記及邀請朋友有一定難度。

要捨難取易，可考慮工銀亞洲，新舊客戶成功登記及領取一萬元可獲50元現金。至於大新銀行則為頭一千名成功登記客戶提供20元現金獎賞，過去擅長半夜搶iPhone、自問手快的朋友亦可以一試。

超進取 VS 超保守

意外之財到手，大家的用錢取態離不開超進取或超保守。所謂超進取，係你本身有相當賺錢本事又唔等錢使，故此有條件「進取」地以這一萬元押注谷底反彈股。所謂谷底反彈，是指疫情期間股價墜到谷底，但本身業務仍有相當價值的股份。最佳例子是剛公布獲政府入股注資的國泰航空，此例一開對民生及有戰略價值的股份都可能獲政府水源支援，按此估計，載通及新創建蝕住做的巴士業務就成為亮點。另外受經濟疫弱衝擊的股份如本地銀行及能源股，都具備重組及復甦概念，所以近日已有資金追捧東亞及中海油，而這幾隻股票手持一萬元都可以入場。

至於超保守就係保本或賺息，逆向賺息首選係用來清卡數，即時節省數十厘罰息。另一途徑係做滙豐新客，於7月31日前透過滙豐理財App開立個人綜合理財戶口可獲兩個月10%港元儲蓄存款利率獎賞。資本較充裕朋友，亦可以考慮中銀香港的定存優惠，新客戶透過手機App開戶並領取一萬元後，再以手機App或網上銀行開立十萬元三個月港元定存即可享4.3%高息優惠，賺取約一千港元利息，不失為保本又可以利用政府派錢借力賺甜頭的門路。