【又一單】文化機構賤老闆 唔找Freelance數
最近曾經為無綫節目《美女廚房》擔任美女學徒的程美段 (Kiwi) ,因為9000蚊酬勞,與杜汶澤決裂,由此掀起Freelance熱議。
好多人成日都話,做得freelance,預咗俾人走數,所以教路做乜都要白紙黑字,就算有起事上嚟,都有得追究。
之但係,當Freelance預到一啲賤到無倫嘅老闆,死都唔找數,又真係無佢符!
小編朋友做文化機構,手上處理唔少Freelance case,因為好多稿件要外判俾人寫,為咗保障公司同Freelance寫手,基本上雙方都係白紙黑字用email溝通。
之但係,唔知老闆咩事,竟然話因爲部門budget唔夠錢,突然話唔會再簽名批freelance budget,所以四月一大堆Freelance數,因為佢一個人唔肯簽名,全部找唔到。
其實,個文化機構老闆喺行內都出晒名庹縮,勢估唔到,今次話就算出咗invoice都可以無錢。
朋友好老實咁同班Freelance講返個情況,話4月筆數可能有排都未找到,於是俾一班Freelance鬧到飛起,揚言話如果過期都唔找數,就會開名投訴去報紙度。
對於呢單嘢,朋友都知係公司理虧,但都幫唔到班文化Freelance出頭,仲擔心自己有機會因爲咁而孭飛賠錢,因為始終係佢同班Freelance去deal。
文化Freelance,好多都係食理想,絕對唔係賺錢買花戴嗰種,希望嗰位老闆可以高抬貴手,畀返條生路大家啦~~
===================
19網輕鬆爆料熱線,歡迎舉報老細同事19惡行,立即click入去講畀我哋知啦