台式茶泡沫幾時爆破？

本地台式茶市場的泡沫，豐富度已媲美台式茶本身那一層「奶泡」。當經濟放緩時，例牌農曆新年後市況會吹冷鋒，台式茶泡沫會否就在這時爆破呢？

香港人對飲食瘋潮泡沫身經百戰，綜觀過去這類泡沫爆破的軌跡，離不開三部曲。首先係惡性競爭，飲食生意特點係容易參一腳，所以不論係內行人或外行人，當見到一個瘋潮來襲，都會趕忙搭一轉順風車。現時台式茶瘋潮明顯有此跡象，當一條街有四、五間台式茶店並存時候，很快便會由鬥味道變為鬥平，但租金、店員人工就無得減，實力稍弱的參與者只好投降離場。

二係汰弱留強，所謂強、弱，未必係指用心製作兼真材實料便算強，而係品牌及企業的財政實力。挾強大資本的過江龍，又或已趁勢上市集資的本地薑，甚至是本地、過江龍的合資企業，通常在飲食瘋潮退潮時，都較容易穩住陣腳，頂多只是適度收縮分店數目。這一浪守得住後，由於台式茶始終有一定客路，這盤生意就可以長做長有。

三係最壞的情況受突發消息衝擊，上次台式茶瘋潮幻滅，正是受台灣塑化劑風波影響。

現時台式茶店泛濫，難聽啲講係市場參與者品流日漸「複雜」，部分擺明趕搭順風車的投機者，品質控制或員工培訓都可能相當求其，只要爆出一、 兩單甚麼化學劑當奶當茶當黑糖，又或店員從地上檢拾珍珠重用片段「流出」，台式茶便可能由天天必飲的「小確幸」，變成人見人怕的飲品。考慮到泡沫越大，復原期越長，假如今次台式茶泡沫又係因食安問題而爆破，復原期可能長達十年，不過好處係不能分解高身膠杯膠飲管的消耗量會大減也。

正中唔飲珍珠奶茶的環保人士下懷，也未必是壞事，只不過從生意角度，茶店漸見泛濫，再加上「國產奶茶」參一腳搶食，最厲害見過一兩條街就有4至5間，等香港人熱情一過，隨時死得慘過葡撻。

===============

財經精選資訊網站「中環街市」 臉書粉絲頁