吉野家小編抽水被炒
今時今日,乜工都難做,尤其做網絡小編,有時對住大家,都唔知講乜好。
話說前幾日出諷刺警員「撕紙王」post嘅吉野家小編,根據報道,都終於抽水抽著火水被炒﹗
是咁的,大家都知前幾日有大批警員執勤去大埔清除載有警員個人資料的post it,而被網民諷刺「撕紙王」,後來有網民用諧音諷刺警員「撕紙狗」,豈料吉野家小編就抽水出post,帖文寫「唔准叫我獅子狗」,借「獅子狗其實叫竹輪」抽水,宣傳近排晚市新餐。
雖然都有宣傳效果,但對品牌被捲入政治,老細就唔多Buy啦,事後有報道證實擁有該經營權的香港合興集團,其總裁洪明基已和涉事的外判廣告公司解約,並解僱負責廣告的in-house員工。而該抽水廣告亦已被刪除(圖片:部份截圖)。
就咁,幾個人就無咗個「大盛」飯碗。
大家集思廣益教教小編,你覺得吉野家小編,係咪真係做錯咗?如果你係吉野家小編,呢個時勢,應該出咩post好?
(下午4:30update:吉野家facebook澄清「小編由始至終都係齊齊整整」後,小編問過該外判公司負責人表示暫時無事)
===================
19網輕鬆爆料熱線,歡迎舉報老細同事19惡行,立即click入去講畀我哋知啦