【國泰出招】香港快運推環港遊 唔夠吸引
國泰終於出招,HK Express 推出環港遊,終於打開疫情下本港的 Flycation市場缺口。
根據 HK Express暫時釋出內容,該環港遊共1.5小時,下午2時半起飛,至下午4時抵達,登機前會有禮物,機上會有遊戲,而賣點都係睇景。之不過就未知到時有無嘢食,路線上會有咩景,有網民擔心,如果單純睇景,坐中間只能睇見空姐。
事實上無目的地飛行plan,疫情下已有不少航空公司推出,比較熟悉的有長榮8月時用Hello Kitty彩繪機,在空中飛出「愛心航路」的「類出國」行程,而行程範圍都好大,飛行路線會經日本與那島國上空,南至三仙台、綠島小琉球等,最後飛出一個「讚」字回航;第二班的「類出國」行程,路線圖如下。
其次是澳洲航空的7小時無目的地飛行,路線上可看到大堡礁和烏魯魯巨岩,機票推出10分鐘就售罄;另外汶萊皇家航空則以 Dine & Fly為主題,主打85分鐘行程中的精緻美食,據說步以上航空公司的步伐,新加坡航空都將於10月中旬推出無目的地的Flycation。
就咁比,牌面上HK Express認真輸蝕,一來坐廉航去旅行最辛苦其實就係焗喺飛機入面,二來1.5小時如果無美食做賣點,又真係唔夠吸引,三來睇景好視乎路線。筆者估計,參考汶萊皇家航空睇橋(淡武隆大橋), HK Express應該都係睇下青馬大橋、港珠澳大橋,咁以Flycation來講,比起酒店大熱的staycation,就吸引力欠奉了。
酒店staycation,執晒行李住一兩日,都可以有旅遊感覺,但如果只係1.5小時Flycation,落地都係香港國際機場然後返屋企瞓覺,旅遊感覺認真未如理想。既然肯Flycation,國泰何不多走兩步,索性跟兩大樂園或酒店搞套票,飛完落機專車送去酒店,豈不比上機落機更佳?
===============
精選資訊網站「中環街市」 臉書粉絲頁