外國調查:過半打工仔 參加公司派對唔開心
公司聖誕派對年年有,但有幾多個打工仔女真心enjoy呢?據美國酒精飲品品牌Four Loko一項調查,訪問了2000位美國打工仔女,當中只有47%稱參加公司派對好開心。
好明顯,覺得唔開心嘅人比較多。調查發現,有26%嘅受訪者表示,在公司派對上做過令自己後悔嘅事,排頭三位分別係搭上同事、講唔禮貌嘅說話,以及講人閒話;另有10%更稱在派對結束後,直接喺辦公室瞓著。
事實上,全公司嘅人都會聚埋一齊,平時公事上唔想見到嘅煩人、仇人、怪人,通通都在場,難怪62%嘅受訪者坦言,會在派對上迴避垃圾同事。
調查又指,打工仔女最唔想喺派對上做嘅事,除咗被逼同其他人傾偈social,就係見到老細嘅身影出現。當中,有36%受訪者稱,曾經見過老細喺派對上出醜,做出令人尷尬嘅事。
經過「多姿多采」嘅公司派對過後,有18%受訪打工仔女表示,到第二日返工時會感到尷尬;當中更有16%嘅人坦言會詐病請假,索性唔返公司。
唔想自己下年成為同事之間茶餘飯後嘅話題,咁今年出席公司聖誕派對時,記得打醒十二分精神啦。
來源:Inc
===================
19網輕鬆爆料熱線,歡迎舉報老細同事19惡行,立即click入去講畀我哋知啦