外國調查：71%打工仔稱聽歌開工更有效率

音樂可以陶冶性情外，原來仲可以幫打工仔女提升工作戰鬥力，做事更有效率。早前人力資源公司Accountemps一項調查指，71%嘅受訪打工仔女稱，聽住音樂開工，令其工作效率有所提升。

該調查訪問了逾1000名美國打工仔女，當中有85%表示，享受一邊工作，一邊聽音樂，尤以年輕打工仔女比佔最多。在18至34歲嘅受訪組別中，有95%稱會聽住歌開工。

調查續指，受訪打工仔女認為最能提升效率嘅音樂類型，首位係大眾熟悉嘅流行音樂，其次為搖滾音樂和鄉村音樂。

事實上，44%嘅人坦言，員工在工作時間聽音樂，公司並無任何限制；另有38%指，公司容許員工返工聽音樂，但要守一啲規矩，如一定要帶耳機，唔使逼人聽歌；亦有9%稱公司講明返工時間唔准聽歌。

但藝術嘅嘢一向好主觀，鍾意聽嘅叫音樂，唔鍾意聽嘅就係噪音。

Accountemps提醒，即使你有幾愛首飲歌，聽得幾陶醉都好，亦唔好喺公司哼歌或拍手踏腳打拍子，因為會嚴重滋擾到隔離位同事。此外，和同事傾公事時，唔好繼續播歌住啦，事關咁做唔太尊重對方，等自己一個人開工時再聽啦。

唔知各位打工仔女最常聽嘅開工「打氣歌」又係乜呢？歡迎留言分享。

來源：PR Newswire

===================

19網輕鬆爆料熱線，歡迎舉報老細同事19惡行，立即click入去講畀我哋知啦