外國調查:77%打工仔稱返工飲唔夠水
唔少打工仔女都話,坐得辦公室多,病痛都多啲。無計啦,既要日日受公司嘅氣,又要吹住個大冷氣,搞到自己又凍又Dry,想唔病都幾難。
根據標準,一般打工仔一日要飲8杯水,但最近Quench一項調查顯示,喺逾1000位受訪美國打工仔當中,有77%人的確認為自己每日喺公司都飲唔夠水來,非常之Dry。
該調查指,有43%受訪者覺得自己飲唔夠水嘅原因係「唔覺得口渴」;其他主要理由還有「無時間飲」、「水要俾錢買」,以及「唔鐘意公司啲水嘅味道」。
專家表示,脫水狀態出現後,人才會覺得口渴,所以打工仔女唔應該等到開完會,先醒起要飲水。早年有研究指,輕微脫水會即時對工作帶來負面影響,事關僅僅流失2%身體含水量,已經可以令人動力降低、疲勞增加,甚至出現焦慮和記憶變差嘅情況。
此外,話自己飲得夠水嘅百分比,男(27%)比女(20%)要多;另外年輕Y世代(26%)又比老一輩X世代(21%)更常飲水。
所以話,返工都要錫身啲,飲一啖水唔會嘥好多時間,最好搵定一部最近自己座位嘅水機,定時定候斟杯水飲,唔係捱病咗無人可憐你。
來源:Human Resources / Pick The Brain
===================
19網輕鬆爆料熱線,歡迎舉報老細同事19惡行,立即click入去講畀我哋知啦