大埔老居民分析 天鑽的缺點
最近大埔天鑽入飛旺到筆者都有親友話想入,同我講天鑽9分鐘就落到大埔站,建議「入定無壞」。但充滿懷疑精神嘅我,當然睇睇該區居民,點睇個盤。
利申筆者住過大埔10幾年,但已搬離好幾年,有新發展都未必知(例如節拍執咗未,區內經濟、交通如何,不會最update),不過上網睇到以下呢位聲稱住了大埔超過30年嘅居民分析,又幾頭頭是道。
該居民集思廣益,大擔分析:
天鑽未必9分鐘去到大埔MTR,所謂實測影片有跑步之嫌:「你話你係田徑選手應該可以9分鐘跑落山,但一定出晒汗。」
夏天上斜回家好辛苦
沿途無小巴和巴士,更重要係大埔MTR村巴上落位已飽和。
發展商無話一定申請到SHUTTLE,無話一定喺大埔火車站上落。
1600伙, 但得3百幾個車位,夜晚CALL 的士未必上
近吐露港公路,噪音問題未有實測。
會有西斜問題
2021年1月收樓,樓花期長
有單位可能望墳景
附近無商店,路上又太靜
睇落該居民又唔似打手,而佢建議各位準業主最好身體力行去行一行,唔好盲買樓呢點,又講得幾啱。
其實筆者覺得,好多配套問題,通常入伙後就能慢慢解決,但關鍵都係因為條行山片太可疑,9分鐘落到去,真係篤住google map都知可能性唔高(又唔敢話無可能,平日見AA行得好快)
===============
財經精選資訊網站「中環街市」 臉書粉絲頁