大茶飯│守到盈利才是勝利（青冰）

過年前買乜都升，不過上星期的跌市，走避不及都屬人之常情。 (erhui1979 via Getty Images)

2月經歷了一個先高後低的過山車走勢，農曆年前一片好景，北水放假都未阻港股高收，恒指在年初六升至31100點之上，不過北水在長假後反高潮，你炒得高佢就係咁食糊，新經濟股轉弱，舊經濟接棒，但隨着美國10年債息升穿1.2厘，升勢加速，個零星期就升穿1.6厘，觸發了美股急回，港股在環球氣氛唔好，財爺自殺式加印花稅幾方面夾擊下，上星期三跌914點，之後星期五跌1,093點。

誇張啲講，過年前買乜都升，不過上星期的跌市，走避不及都屬人之常情，這個幾月贏得咁順景，忽然要面對輸錢及諗止蝕，不是人人可處理得到。在如此市況，新手或會氣急敗壞，周圍問專家呢隻股點處置，那隻股是否要斬纜，但甚少人用整個倉位的維度去看及斷捨離。

經驗及紀律左右賽果

有一個簡單的方法，可幫自己的倉位health check，恒指2月埋單係升2.5%，納指就微升1%，標普跟恒指相若，升2.6%，換言之2月股市雖然臨尾唔見一大截，但仍是錄得升幅，如果戰友們的倉位，在2月要倒輸，坦白說是響起了警號。某些戰友2月雖仍保勝果，但原來要靠IPO頂住先贏錢，2月有心通（2160）、快手（1024）及諾輝（6606），升五成至一倍幾，加埋都好和味，但這些都是一次性效果，剔除IPO盈利後2月係輸錢的話，亦反映操作上出現了問題。而最差的一個情況，就是上星期的跌市，令今年的盈利全報銷，這反映了倉位太過進取，原因不外乎係槓桿太高，選股太集中在風眼股，又或者係太遲入場，1月盈利唔夠豐厚，一個浪打埋嚟已經見到你無褲着。

新手同老手的分別，主要在於經驗及紀律，未必跟股齡有關，青冰身邊有些涉足股壇廿年的朋友，遇着股災都係兩眼望望死坐，唔識去逃生。今年這一段攻勢，贏得易贏得快，很容易令人迷失，迷失者，即係覺得股市唔會跌嘅，即使跌完都會升返凸，根本入市前係無諗過退路，這種有前無後的打法，順風時係會贏大鑊，逆景時盈利夠唔夠頂，就靠自己駕馭風險的能力，青冰常用的方法係，將盈利數字高位mark低，日後出現高位回兩成的話，實在應該重檢倉位。

最後引述費sir的兩句話作總結︰「Attack wins you games, defence wins you titles」，守到盈利才是勝利啊。

青冰

http://www.fb.com/chingbing888

本欄逢周二刊出

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。