如果City Super變中資

.

City Super突然傳出賣盤，令人憂慮這間富貴超市會否步一些傳媒、零售企業，淪為被中產嫌棄的品牌？假如成真，又有哪些強者可以取而代之？

按股神智慧，City Super都算擁有強勁護城河，City Super佔據多個一線商場就腳位置，多年來已建構強大採購團隊，貨品水準有保證，熟食及刺身攤位更凝聚一班中產上班族fans。但假如今次係售予靠舉債收購的內地財團，又可能重演大家熟悉的收購後裁員、縮皮、管理及貨品水準急降的劇本，不幸言中就會嚇走大量中產忠粉了。

不過中產即使嫌棄City Super，但他們仍然要去超市入貨，意味將有一個吸引商機擺在眼前。City Super的「堡壘」，行內早已虎視眈眈，能夠取而代之，熱門之選係四叔恆基，恆基旗下有UNY、APITA及PIAGO三大高級超市品牌，加上在尖沙咀及中區將有高級商廈項目落成，正好用來作為擴張富貴超市據點，若能成功從City Super挖角，確實有本事可以取而代之。次選係新地系一田百貨，雖然一田一直做得有聲有色，但要進軍富貴超市戰線一田品牌或未夠照，可考慮從海外引入富貴超市品牌，借力搶攻此戰線。

超市戰國時代

除了本地勢力，日資亦可能借此機會重回香港。日本提升消費稅後，當地零售市道淡上加淡，要增加吸金力唯有更倚重海外市場。既然去年有食其家及DON DON DONKI成功搶攤，或會吸引日資百貨來港齋搞富貴超市。

如果富貴超市市場因為City Super轉莊進入戰國時代，對出街食飯手擔驚受怕的中產人士而言都算係好事，至少可以由買餸、熟食代替外食，只是若然超市加大與餐飲的間接競爭，就可能令貴價餐飲業如美心集團雪上加霜了。

===============

精選資訊網站「中環街市」 臉書粉絲頁