巴士污糟係因為⋯乘客無公德心?
近日九巴公佈「紅巴2.0」,車內設施大升級,但勢估唔到,竟然引爆網民「新又點?都無人清潔嘅」的爭議。
事件引爆原因,係有網民留言批評,再加上,進擊的九巴小編,竟然有勇氣反擊﹗回贈一句:「清潔又點?都無公德心嘅。」
九巴小編:「我哋當然有清潔啦🙂 如果冇清潔,真係不堪設想。」
巴士污糟邋遢到底係九巴無清,抑或乘客開餐、香港空氣太混濁所致,真係難有結論。
後來,九巴小編索性貼片,重伸真係有清潔,但有乘客就自爆見過啲玻璃窗好油,清唔清潔到,係睇有幾多資源去開清潔合約,會唔會係肥上瘦下嘅結果?
有乘客留言:
「我代你答埋啦,九巴將會係5月開始新一份外判清潔合約,再加埋有新嘅檢查清潔制度,相信到時九巴既巴士清潔會有改善。」
「一間公司可以咁講嘢,勁。」
「玻璃窗嗰pat油幾耐清一次呢?日日搭同一班車同一個車牌號碼都見到有油」
「又講得岩喎!無公德心,啲巴士點清潔都係唔乾淨,又不如車廠開放日搵幾架未清過既巴士,比班西客體驗下清潔巴士呀!」
「又好似駁唔到KMB,有乘客整污糟架車好似唔係KMB責任。真心講KMB幾耐洗一次車你都冇聲出因為架車係佢嘅,唔鐘意真係可以唔搭KMB」
「呢舖我撐九巴!」
「撐九巴, 1)我唔覺新城特別乾淨 2)樓主講嘅頭油係好主觀觀察,當有個客成個星期唔洗頭,一挨落窗,其實足以造成樓主所講嘅成吋頭油,並唔需要一個星期唔清潔巴士先出現」
小編粗略總結,今次留言似乎係撐九巴嘅人數較多。
頭油客就無計,不過近年的確湧現不少大條道理上車開餐嘅乘客,可能打工仔返工太忙,真係忙到無時間,如果唔俾開餐,隨時會活生生餓死街頭;小編唔鼓勵大家上車開餐,但如果真係要開餐,請注意清潔啦,免得九巴又話香港人無公德心。
===================
19網輕鬆爆料熱線,歡迎舉報老細同事19惡行,立即click入去講畀我哋知啦