雅虎香港財經 巴菲特一早就買電動車股
Tesla爆升，有人會取笑股神睇漏電動車龐大商機。但其實股神早在2008年就掃入一隻電動車股：比亞迪。
美股、外匯、加密貨幣免費即時報價，自選投資組合獲取相關新聞提示。
八蚊入貨神話
股神巴菲特透過旗艦巴郡在2008年斥資約2.32億美元（約18.09億港元）買入2.25億股比亞迪，持股量約10%，而上車價只係8港元。去年比亞迪股價曾高見278港元，按入貨價計股神快人一步押注電動車勁賺逾34倍。即使近期受制內地電動車市場湧現強勁對手，令比亞迪股價回落至170水平，股神仍勁賺逾21倍。
當年促成巴菲特入股比亞迪係其好拍檔芒格，話說芒格透過朋友認識比亞迪總裁王傳福，芒格認為在王傳福身上看到愛迪生影子，於是前後三次力勸巴菲特入股比亞迪。值得一提係巴郡本來想買夠25%比亞迪股權但被王傳福婉拒，食檸檬反而令巴菲特認為王傳福唔係趁機賣甩公司的創業者，增加對這單交易的信心。
近期經常被人用來與巴菲特比較嘅「契媽」Cathie Wood，她旗下的ARK AUTONOMOUS TECHNOLOGY & ROBOTICS ETF(ARKQ)亦持有比亞迪，不過佔基金比重只係1.65%，雖然比重遠不及Tesla（11.49%），但亦反映女股神同樣肯定比亞迪在電動車市場的份量。
股神投資電動車兩大疑團
股神不單無睇漏電動車商機，兼且一早已經「上車」。現在有關股神投資電動車尚有兩大疑團，首先係股神會唔會買Tesla。從股神旗下巴郡2016年先首次買入蘋果往績睇，股神似乎仍有誘因追入在電動車擁有品牌優勢的Tesla。
不過此疑團去年股神曾明確表態，他接受Yahoo財經訪問時，被問到對Tesla掌舵人馬斯克評價時，他概括地回應指馬斯克正在做了不起嘅事，不過再被會否投資Tesla時，股神就直截了當回應「NO」。
純靠估，在公在私巴菲特反口買Tesla機會仍不大，一是Tesla真係貴，估值有唔少水份係基於對未來「想像」，暫時唔太切合股神揀股口味；二是馬斯克不時揶揄巴菲特，既指股神份工好悶，又指護城河概念已out，從股神角度睇，忽然入股Tesla可以會被對方笑足幾年，這個心理關口都唔細。
第二個疑團係股神會否大手減持比亞迪，現在比亞迪較大隱憂係強敵湧現，既有新崛起的內地車企，多間跨國車企亦集中火力搶攻此市場。不過比亞迪首季仍保持強勁增長，產量增76%、銷量亦升70%，比亞迪另一優勢係掌握多項電動車技術，例如近期力推標榜大幅提高續航力及安全度的「刀片電池」，比亞迪就會透過旗下「弗迪電池」向其他車企供貨。比亞迪亦與豐田及戴姆勒成立合營企業，為未來向海外車企供應電池舖路。
另外比亞迪早於2004年就成立比亞迪半導體，現時係內地最大車用半導體零件IGBT廠商，戰略投資者包括南韓SK集團、小米、上汽、北汽等，有望今年完成分拆上市。電池加半導體優勢，令比亞迪即使面對新競爭者，都可以轉型為賣技術及零部件超級供應商，一如Sony在手機市場上的獨特地位。加上股神入貨成本實在平，預計股神及其投資團隊一股不留沽清機會較細，反而較有機會係像處理蘋果般逐少減持，套現資金押注具疫後潛力行業如藥廠股。
伸延閱讀
