急放股票膠事錄

侵侵玩twitter搞到尋日港股大跌，尚有水位賺的散戶固然急住出貨，上星期追貨的散戶就可能放得更急，不過趕住沽貨往往會出現膠事，以下幾件沽貨膠事可能會引起你的共鳴。

執返半對Jordon

話說多年前筆者朋友既炒股又儲波鞋，貪名氣認購了某隻系出名門的新股，可惜當首日掛牌前這隻新股已不斷出現利淡消息，由於當年網上交易不時「當機」，買賣熱線又經常唔通，為求甩到貨唯有一早跑到某大銀行交易櫃位，終於排到他時忍不住大聲同銀行阿姐講：「快手幫我放8xxx，依家跌到無咗對Jordon波鞋啦。」朋友以波鞋為蝕本單位的「求救宣言」，吸引銀行經理跑過來關注一下並指示銀行阿姐盡快處理沽貨指令，閃電沽貨後，銀行經理更報喜：「沽貨個價升返少少，你應該可以執返左邊Jordon加多一條鞋帶。」如此貼心的服務，難怪這間銀行年年賺大錢兼每季派高息了。

沽貨變入貨

手機App普及後，連帶網上證券服務介面設計都向App學習，介面盡量簡化，按鍵變得又大大醒目。但未有手機App前，不少銀行的證券買賣網頁十足大家日日用的MS Office，字又細版面又架床疊屋，按鍵又係細細粒，於是不少散戶趕住沽貨時都可能試過明明想賣但唔少心按錯「買」，即時發現盡沽，至少都要蝕多一筆交易費。更離奇係聽聞有人試過明明想放A股票，因為急住放又分心望住個市，竟然按錯賣B股票，嗱嗱聲補放A股票，埋單計數都係蝕多咗，仲要無端端放了仲想繼續揸的B股票。

身不由己

很多時港股大跌市都像昨天一早就跌，當你返到公司想趕急set盤沽貨時，你老細就話開會又或捉住你傾嘢，咁聽住老細訓示，除非你想爭取被炒機會，否則都不敢在老細面前勇武落盤沽貨吧。到步出老細房或會議室後，沽貨機會已溜走，這時候望住個市跌幅擴大，就只可以暗暗感歎：「仲沽唔沽好呢？」

更悲涼的情況係幫女友操盤的男士，通常這類大跌市都會收到女友whatsapp吩咐沽貨，至於點解佢唔自己搞，原因離不開「怕煩、好忙、呢啲嘢晒旨意你」，這時候你就會陷入點做都死困局，捉到是日像樣價位沽貨，女友都會怨蝕錢，到第日升返又再怨仲乜你唔阻止佢沽貨。沽唔切第二日繼續劈價的話，你便可能要強忍至少幾個星期的奪命「煩音」了。

當然，以上膠事如遇上翌日強力超賣回彈，都可以變成樂事，唔知你有無試過因禍得福，老細個會，救你一命呢﹗

===============

精選資訊網站「中環街市」 臉書粉絲頁