【扮工收風】上司call食團年飯慘食檸檬
上司冇義務請下屬食飯,但你有無試過,上司扮闊佬,但到頭來又嫌貴?
話說就來新年,朋友一向姑寒到係人都知嘅上司,見到隔離team上司陸續約自己team食團年飯,於是叫秘書都幫手問吓同事有冇興趣食,但就提秘書一定要同同事講到明係「AA制」,仲要求要喺email上面寫明,廢事有同事會錯意。
呢封email一出,同事立即議論紛紛,狂鬧上司「cheap」,仲話「如果係AA制,我寧願揀同我鍾意嘅人一齊食,唔明點解要同你呢個上司食。」
全team十幾人,最後只有一半人email accept咗呢個invitation,剩低一半決定同一日同一時間約埋去第二間食。 結果秘書尋日覆返上司只有一半人接受邀請,上司立即拍晒枱大鬧,然後反問秘書:「乜嗰日咁多人放假咩?我冇收到有人請假喎。如果佢哋要返工,唔通佢哋唔使食飯?」
然後就再叫秘書officially整咗個excel表,再叫同事填多次會否出席,如果答否,就要在旁邊寫埋原因,因為呢個團年飯已經變咗係team building一部分,同事如果唔係有合理原因,都務必出席,依家搞到同事都唔敢再say no。
想問下天下間嘅老細:其實唔想請咪唔好搞囉,又要面又要搞又要逼人AA究竟係乜玩法?唔該搵人解答一下。
===================
19網輕鬆爆料熱線,歡迎舉報老細同事19惡行,立即click入去講畀我哋知啦