【扮工收風】做公司義工隊另有所圖?
周圍都講企業社會責任,唔少公司都會成立義工隊,招募公司同事參加。有籌組義工隊嘅朋友就大吐苦水,形容參加義工隊嘅同事,好多都唔係想做義工,往往另有所圖,仲總結出以下幾大現象:
1)因為公司搞義工活動,一般都會有公司管理層出席,同事平時返工接觸唔到管理層或者老闆,就決定透過參加義工活動去接觸,爭取曝光同與管理層嘅合照機會,先係最大目的。
2)做義工只為飲飲食食,義工活動分好多種,有帶老人家飲茶、探訪、歡度佳節,亦有搬搬抬抬、清潔長者屋企等,但永遠只係飲飲食食有人報名,其他就乏人問津。
3)有同事竟然狼死到做義工都夠膽死補假,當自己星期六日嘅義工活動係例行公事,又要扮有愛心又唔肯犧牲,咁都叫義工?
做義工做到咁攻心計,朋友見到就炆,仲話如果真係咁計算,不如索性唔好報名。不過小編就同朋友講,員工又的確有自由選擇,始終公司唔係開善堂,計算下都無乜問題嘅。
===================
19網輕鬆爆料熱線,歡迎舉報老細同事19惡行,立即click入去講畀我哋知啦