【扮工收風】公司「親生仔」 低人工過新同事
公司有幾重視現職員工,真係望吓大家份人工都知道。話說有貿易公司「親生仔」拎住大學畢業生份人工,一直做6-7年,每年最多加得果3-4%,幾經辛苦終於捱到2萬蚊,點知公司有空缺,請返個年資4-5年的新同事返來,人工竟然有2萬3咁多。
打聽得來原因係,因為新同事中間跳多咗一次槽。
「親生仔」聽到呢個形勢,有唔少同事都走去上司面前「發爛渣」,話自己冇理由低人工過年資比佢低的人,要求公司立即加人工,起碼要同新同事睇齊。
但身為老闆同HR邊咁易屈服,怕一旦開咁先例,之後就人人嘈住要加人工,到時真係執笠都唔掂。 人來人往後,呢班在公司浮沉了多年的「親生仔」好多都對公司心淡,只好蟬過別枝。公司最後咪又係要用高價在市場請返晒啲新同事返來,員工成本又係高。
上司走晒啲同事後,都不禁慨嘆:「有錢請出面啲人,都唔肯俾錢加自己同事人工,真心可悲。」其實,人類總愛犯同樣的錯誤,好多老細都會因為咁大失人心,得不償失,唔知你公司,又有無出現過呢個現象?
===================
19網輕鬆爆料熱線,歡迎舉報老細同事19惡行,立即click入去講畀我哋知啦