【扮工收風】合約工OT 300個鐘 中介拒補水
打開招聘廣告,份份工都係合約工,仲要係經由食水深加計到盡嘅中介出手請人,邊個接咗個offer都冇運行。
小編身邊部份朋友係打中介工,幾乎日日都為咗病假、扣假、OT、補水、保險等問題同中介公司嘈,有眼淺氣急嘅女性朋友仲要嘈到喊晒,搞到全公司都知。
最最最慘係呢幾日有做合約工嘅朋友遞咗信,合約講到明14日通知就走得,但因為佢呢一年好多project做,OT得好勁,所以累積咗成300個鐘OT,總計有成37.5日假。
點知公司HR同中介夾埋玩嘢,HR唔肯直接扣假,中介唔肯直接補水,兩邊互卸,朋友嘈極都冇人肯負責,兩邊都話唔關自己事。
結果朋友只好當呢300個鐘OT係分手禮物,諗緊都淒涼。所以如果OT有補假,盡可能都快啲補,儲埋儲埋冇著數呀!
===================
19網輕鬆爆料熱線,歡迎舉報老細同事19惡行,立即click入去講畀我哋知啦