【扮工收風】同事私密照被擺上公司網站
你以為返工唔得罪老闆,就會一帆風順?非也。最緊要係唔好得罪身邊嘅同事,尤其係低級過自己嘅同事,因為佢哋好多時會不理後果。
小編朋友最近只係為咗工作上嘅一個project,唔小心同隔著team個新入職文職女開火,就俾對方將自己啲日常生活私密照,擺上公司嘅facebook專頁。
實際嘅情況係公司facebook專頁每一日都會post公司社會企業責任啲活動相,但就有個鬼account在每個post不斷留言,仲配埋同事平日嘅泳衣照、攬仔照,甚至近鏡素顏照,完全就係惡作劇。
最慘係老闆日日都會上facebook睇吓網民啲反應,好彩今次發現得早,老闆似乎發現唔到,但同事之間已經傳到㷫烚烚。
之但係天網恢恢,最後公司一班花生友暗地幫手緝兇,終於發現文職女神情有異,chok佢兩chok,就鬼拍後尾枕,乜都講晒出來。事件先叫做告一段落。
所以話,千祈唔好得罪小器嘅同事,有時佢哋嘅報復手法真係超過你想像!
===================
19網輕鬆爆料熱線,歡迎舉報老細同事19惡行,立即click入去講畀我哋知啦