【扮工收風】同事一過試用期就大肚
辦公室入面總有一啲好識得計數嘅打工仔,而呢類打工仔永遠都贏唔到老闆歡心,因為比老闆識計數,其實就等於攞緊公司著數。
最近朋友公司有位新入職女同事,就係因為咁得罪咗老闆,原因就係佢一過咗試用期就同老闆講自己有咗,雖然滿口意外,但老闆由一開始都冇信過,更開始對呢位大肚下屬惡言相對,不滿佢做任何嘢,要求勁mean。
有同事覺得老闆唔體諒大肚同事,但老闆親信就覺得係大肚同事踩中天下老闆死穴。有次朋友喺Pantry偷聽,親信覺得首先,老闆係想請咗個人返來幫手「搏命」,而唔係想請個人返來養胎等放產假。
其次,老闆會認為你連自己人生個plan都計劃唔到,邊有信心交公司個plan俾你?一陣又出意外咁點算?
第三,一過試用期即有咗,好難唔令人覺得你玩嘢,有心攞公司著數。
而最最最重要係,大家唔係做咗好耐同事,同事之間都會唔gur呢樣嘢,因為你霸咗個head count,公司又冇得請人,即係要同事執你手尾啦!
如果你係呢位大肚同事,你會唔會好來好去,自己遞信算數?
===================
「扮工男女」道盡職場人生百態,如果想同人分享老細惡行,立即click入去講畀我哋知啦