【扮工收風】有PR要求加30%人工

 

聽HR朋友講，踏入第3季，跳槽轉工愈玩愈旺，依家真係好多大大小小公司都話請人，俾出嘅offer都唔差。之但係「凡事太盡，緣份勢必早盡」，HR朋友就話好多打工仔都乘勢抬價，有些更加企硬，傾都冇得傾。

佢舉例，有做開商業機構的PR就算冇升職，都要求加30%人工，一蚊都唔肯減。最終雖然公司都肯讓步，但未來上司已經對呢位員工的印象分大減。以下三點係HR朋友教路，教各位打工仔點樣退一步海闊天空。

1）叫價唔好咁狼： 轉工第一步要認清市價，就算行情旺、缺人，叫價都未必太高。有求職者會同HR講，我要呢個人工，因為係市價。問題係市價還市價，俾唔俾你係睇你能力。一般嚟講，轉工加薪10%至15%算合理，加15%至25%就係你好命。想加30%以上就係獅子開大口。

2）原公司升職好過靠轉工升職： HR眼中，跳槽升職成日見，但原公司晉升先係實力，更證明你做到嘢。所以打工仔唔使咁心急。

3）轉工人工升得快，但想轉返去大品牌公司就有難度： 好多打工仔為人工，不斷在細公司跳來跳去，人工一下子跳到三萬尾四萬頭，但當想安定，搵間好一些的大公司「靠岸」，大公司就嫌你貴，因為佢地大把人揀，比你後生比你便宜的，大有人在。

所以如果你搵到間好公司，就唔好因爲一時人工而亂轉喇。

===================

19網輕鬆爆料熱線，歡迎舉報老細同事19惡行，立即click入去講畀我哋知啦