【扮工收風】某公營機構 行山都要寫報告
某公營機構非常睇重工作安全,但好多時都矯枉過正,唔止HR、就連同事都被洗腦,搞到做少少危險嘢都俾人警告,甚至要寫報告,以下係一些例子,大家覺得合唔合理呢?
1. 冬天俾紙𠝹損手好平常,但如果你𠝹損手之後想拎張公司膠布去貼,sorry喇,你拎完之後要立即寫返份報告,交代你係點整損隻手。
2. 放工一出公司就係等到阿媽都唔認得嘅紅綠燈位,想衝紅燈,sorry喇,周圍都係線眼,會有同事email同上司及HR報串,話衝燈同事唔顧人身安全。
3. 部門聯誼活動去工廈玩人肉足球,sorry喇,因為有整親頸椎風險,所以禁止再去,而聯誼搞手都要寫report。
4. 行山路窄有一段仔路程要行出馬路?sorry呀,唔得呀,搞手返去寫報告,解釋返點解唔先評估路程風險,先好去行山。
你話喇?算唔算矯枉過正?
===================
19網輕鬆爆料熱線,歡迎舉報老細同事19惡行,立即click入去講畀我哋知啦