【扮工收風】聽林鄭講買樓 點知剛被炒
好多事以為坐定粒六,點知往往事與願違。
有人竟然喺林鄭800萬9成按嘅「德政」下,洗濕個頭買咗個800幾萬嘅單位,點知幾日前收到公司裁員名單,發現有自己份。面對嚟緊糧單不齊,呢位打工仔隨時慘蝕50萬!
是咁的,近日同大型鐘錶集團朋友傾開前景,佢話經濟唔好,好多商業機構都話要裁員,佢哋都被逼交人,因為需要cut嘅budget都大,與其cut啲人工低嘅手腳位,不如cut啲人工高嘅中高層,有一team因爲有兩個高級經理,所以其中一位自然被擺上裁員名單上面。
當公佈裁員消息之後,呢位高級經理喊晒口求饒,原來佢剛剛買咗間800幾萬嘅樓,如果一下子冇工做,會影響按揭,真係撻訂嘅話就會損失慘重,連埋賠佣賠訂,講緊至少冇50萬積蓄,都幾大件事。
據朋友講,呢位同事希望公司唔好炒佢住,起碼等佢搵到工先,同事仲嘗試搵其他人撐佢,向老細施壓,但其他人就梗係無理佢。
而公司亦當然唔理佢啦,話呢個係個人決定,同公司policy同決策無關。
如果落錯決定嘅係你,你會覺得係邊個責任?
===================
19網輕鬆爆料熱線,歡迎舉報老細同事19惡行,立即click入去講畀我哋知啦